Biblia Sacra (Vulgatam Clementinam)

Psalmi Caput 114 (116 RSV)

ALLELUJA. Dilexi, quoniam exaudiet Dominus vocem orationis meæ.

2 Quia inclinavit aurem suam mihi, et in diebus meis invocabo.

3 Circumdederunt me dolores mortis; et pericula inferni invenerunt me. Tribulationem et dolorem inveni,

4 et nomen Domini invocavi: o Domine, libera animam meam.

5 Misericors Dominus et justus, et Deus noster miseretur.

6 Custodiens parvulos Dominus; humiliatus sum, et liberavit me. 7 Convertere, anima mea, in requiem tuam, quia Dominus benefecit tibi;

8 quia eripuit animam meam de morte, oculos meos a lacrimis, pedes meos a lapsu.

9 Placebo Domino in regione vivorum.

Pater
Filius
Spiritus Sanctus
Angelorum
Satan
Commentarium
Nexus
Graphice
Atlas